“Монцемент Билдинг Материалс” ХХК нь Монполимет Групп болон Европын Сэргээн Босголт Хөгжлийн банкны (EBRD) хөрөнгө оруулалт, дэмжлэгтэйгээр Монгол Улсын Барилгын материал үйлдвэрлэл, нийлүүлэлтийн чиглэлээр үйл ажиллагаа явуулахаар Дорноговь аймгийн Өргөн суманд 2015 онд Дэлхийн хамгийн орчин үеийн дэвшилтэт арга, техник, технологиудыг нэвтрүүлэн жилд нэг сая тонн өндөр чанарын цемент үйлдвэрлэх хуурай аргын цогц үйлдвэрийг барьж байгуулан ажиллаж байна.

Түүнчлэн энэхүү үйлдвэрийн нэг хэсэг болох цагт 120 тонн үйлдвэрлэх хүчин чадал бүхий клинкер боловсруулах үйлдвэрийг хэрэглэгчиддээ ойртон Улаанбаатар хотод байгуулан үйл ажиллагаагаа тогтвортой явуулсаар байна.

Монгол Улсын барилгын материал үйлдвэрлэлийн салбарын хөгжлийн энэ жишиг бүтээн байгуулалт нь түүхий эдийн зүй зохистой ашиглалт, тээвэр ложистикийн зөв шийдэл, байгаль орчины ээлтэй үйл ажиллагаа, техник, технологийн дэвшил ноу-хауг өөртөө шингээсэн цогц шийдэл болж байгаагаараа онцлог төдийгүй улсдаа анхдагч ЭКО үйлдвэр юм.

Монцемент Билдинг Материалс ХХК нь үүсгэн байгуулагдсан цагаасаа эхлэн байгаль орчинд ээлтэй, шинэ технологийг үйл ажиллагаандаа нэвтрүүлэн ажиллаж ирсэн бөгөөд клинкер боловсруулах шугамтай зэрэгцээд хаягдал хийг ашиглан цахилгаан, дулааны эрчим хүч үйлдвэрлэх WHRPG (Waste heat recovery power generation) үйлдвэрийг Монгол улсдаа анх удаа барьж байгуулан ашиглаж байна. Тус систем нь Урьдчилан халаагч болон клинкерийн хөргүүрээс гарах 350-450C хэмтэй хаягдал дулааныг эрчим хүч болгон хувиргах олон улсад хүлээн зөвшөөрөгдсөн Ренкин Циклийг ашигладаг технологи юм.